Денсаулық

Шымкентте 3 айлық сәбиден 3 жасқа дейінгі «ерекше» бөбектер оңалту курсынан өте алады

«Елімізде 49 оңалту орталығы ерекше балалардың емінде маңызды рөл атқарып келеді. Оның ішінде мемлекеттік оңалту орталықтарынан бөлек, «Қамқорлық» бастамасының аясында ашылған 22 оңалту және ерте араласу орталықтары бар». Бұл туралы ҚР Денсаулық сақтау министрлігі Ана мен бала денсаулығын қорғау департаментінің директоры Мағрипа Ембергенова Шымкент қалалық №2 оңалту орталығы базасында ашылған «Қамқорлық» ерте араласу бөлімшесінің салтанатты жиынында мәлімдеді.

— №2 оңалту орталығы ұзақ жылдардан бері балалардың денсаулығын жақсартуға атсалысып, оңалту ісімен айналысып келе жатқан ұйым. Ғимарат өткен жылы күрделі жөндеуден өткен болатын. Мемлекет басшысының тапсырмасына сәйкес, «Қазақстан халқына» қорының қолдауымен бүгін ерте араласу бөлімшесі ашылып отыр. Оған «Samruk-Kazyna Trust» қоры да атсалысты. Осы оңалту орталығында кешенді ем алуға жағдай жасап отырған демеушілерге алғыс білдіреміз, - деді қала әкімі Мұрат Дүйсенбекұлы.

Шымкенттегі «Қамқорлық» ерте араласу орталығы елімізде биыл ашылатын 13 орталықтың алғашқысы болып отыр. Жыл соңына дейін Алматы, Атырау, Шығыс Қазақстан, Жамбыл, Батыс Қазақстан, Қызылорда, Қостанай, Павлодар, Солтүстік Қазақстан, Түркістан облыстарында және Алматы қаласында ашылады.

Айтпақшы, биыл ашылатын 13 орталыққа келер жылы тағы 6 орталық қосылмақ.

— Елімізде жүз мыңнан астам оңалтуға мұқтаж бала бар. Олардың әрқайсысы үшін оңалту емінің маңызы зор. Халықаралық сарапшылар балалар оңалту емін ерте кезеңнен бастаса, олардың денсаулығы 60-80 пайызға жақсара түсетінін айтып жүр. Сондықтан осындай оңалту емінде ерте араласу орталықтарының жұмысын үйлестіру — елімізде ерекше басымдыққа ие, басты назардағы іс, - деді Мағрипа Хамитқызы.

Шымкент қалалық №2 оңалту орталығының бас дәрігері Айгүл Сапарғалиеваның айтуынша, орталық бүгінге дейін неврологиялық, ортопедиялық және кардиологиялық патологиялары бар 18 жасқа дейінгі балаларға оңалту емін жүргізіп келген. Жыл сайын 1500 бала 100 төсек орынды орталықта стационарлық үлгіде ем алған. Енді оған қосымша «Қамқорлық» ерте араласу бөлімшесінің көмегімен 3 айлық сәбиден 3 жасқа дейінгі бөбектер ем ала алады. Неврологиялық диагноздармен, церебральды сал ауруы, Даун синдромы және мидың басқа зақымданулары бар балаларды амбулаторлық үлгіде қабылдауды жоспарланған. Яғни, бөлімше бір мезетте 50 балаға дейін қызмет көрсете алады. Бұл бір жылда 600 балаға оңалту курсынын өтуге мүмкіндік бермек. Бір курс 21 күнтізбелік күнді құрайды.

Салтанатты жиын барысында қаламыздың оңалту орталықтарында тұрақты түрде ем алып жүрген бүлдіршіндер өнерлерін паш етті. Одан соң, Шымкент қаласының әкімі мен қор өкілдері ерте араласу орталығын аралады. Емдік дене шынықтыру залындағы «Бобот» функционалды кушеткасы, емдеуге арналған әртүрлі жұмсақ төсеніштер, валиктер, бұрыштар, «иппотренажер», «Мотомед» тренажері, «Атлант» пневмо-костюмдері, «Корвит» аппаратының қызметімен танысты. Сондай-ақ, су емдеу жабдығы – «Посейдон» құрғақ флоатинг ваннасы, тұзбен емдеу, шунгитті емдеу бөлмелерін және эрготерапевт кабинетінің жабдықталуын көрді.

Шымкентке инклюзивті театр келді

Шымкентке "Действие Буквально " Алматы инклюзивті театрының әртістері келді. Бұл Орталық Азиядағы алғашқы инклюзивті театр зертханасы. Труппа құрамында кәсіби әртістер, режиссерлер, музыканттар және психикалық даму ерекшеліктері бар адамдар бар.

Біздің қаламызда Алматыдан келген қонақтар өздерінің білім беру бағдарламасының семинарын өткізді. Мұндай семинарды Шымкентте "Ерекше жол" қоғамдық қорының арқасында өткізу мүмкін болды. Оның өкілдері атап өткендей, қор инклюзивті театр идеясына қызығушылық танытып, оны қаламызда насихаттауға ниетті.

Үш күн ішінде бағдарлама жаттықтырушылары кәсіби инклюзивті труппа құру тәжірибесімен және психикалық даму ерекшеліктері бар адамдармен театр практикасы арқылы жұмыс істеу құралдарымен бөлісті. Яғни, Даун синдромы, аутизм, церебральды сал ауруы бар адамдар кәсіби актерлермен бірге немесе онсыз ойнайтын спектакльдерді қалай құру керек екенін үйретті.

"Біздің зертханаға жеті жыл", - дейді инклюзивті театры зертханасының кураторы драматург Ольга МАЛЫШЕВА.

Семинарды ұйымдастырушылар театр мамандарына, денсаулығының психикалық ерекшеліктері бар адамдарды дамытумен айналысатындарға және тікелей осындай адамдарға арналған практикалық шеберлік сабақтарын көрсетті.

"Бұл даму ерекшеліктері бар адамдар үшін өте пайдалы іс - шара", - деп есептейді "Ерекше жол" Шымкент қорының басшысы Роза БЕРКЕШЕВА.

- Біздің қорды ерекше балалардың 400 ата-анасы ұсынады. Біз Шымкентте насихаттауға ниет білдірген инклюзивті театр идеясымен жандандық.

ШЫМКЕНТТЕ АЛҒАШ РЕТ МӘЙІТ ДОНОРЛЫҒЫМЕН БАУЫРҒА ОПЕРАЦИЯ ЖАСАЛДЫ

Денсаулық сақтау – қоғамның әлеуметтік өмірінің ең маңызды саласы. Елімізде Тәуелсіздік алған 30 жыл ішінде денсаулық сақтау саласы жетілдіріліп, жаңадан аурухана мен емханалар салынды, заманауи жабдықтармен қамтылу көрсеткіші өсті, дәрігерлер шет елде тәжірибе алмасты. Соның ішінде отандық медицинаның қол жеткізген жетістіктерінің бірі – транспланталогия саласы қарқынды дамыды. Ал Шымкентте ағза алмастыру отасы алғаш рет 2013 жылы қолға алынды. Міне, содан бері, республикадағы маңызды үшінші қалада трансплантация қызметі жақсы дамып келеді. Қазір шетел асып не Алматы мен Астанаға барудың қаажеті жоқ. Ота жасайтын дәрігерлер де, донор да Шымкенттен табылады.

Шымкенттегі №1 қалалық клиникалық ауруханада алғаш рет мәйіт донорлығымен бауырға трансплантация жасалды. Операция 6 сағатқа созылған.

Бауырын алмастырған науқас бес жылдан бері созылмалы бауыр циррозымен есепте тұрған. Қазір оның жағдайы жақсы, реанимациядан палатаға ауыстырылды.

“Мұндай операция оңтүстік өңірінде алғаш рет жасалып отыр. Марқұмның туыстары мәйіт донорлығына заңды түрде келісімін берген. 16-қараша күні түнгі сағат төртте отаны бастадық. Мәйіт донорының өзге де ағзаларын Астана мен Астана қаласындағы емдеу мекемелерінің мамандары санавиациямен әкетті. Операциядан кейін төртінші тәулікте науқас өздігінен тұрып жүр. Жағдайы жақсы. Негізінде мәйіт донорлығынан операция сирек жасалады, оның үстіне дүние жүзінде донор тапшы. Шымкентте ағза алмастыру операциясы 2013 жылдан бері қолға алынған. Бүгінге дейін 191 бүйрек, 30 бауыр трансплантациясы жасалды.”-дейді дәрігерлер.

Шымкент қаласы денсаулық сақтау басқармасының мәліметіне сүйенсек, қалада жыл басынан бері түрлі науқастарға 477 жоғары технологиялық ота жүргізілген. Бұл былтырғы кезеңмен салыстырғанда екі есеге көп. 2022 жылы медицина мекемелеріне 7 жаңа жабдық сатып алынды. Бұл жоғары технологиялық медициналық қызметтер қатарын көбейтіп, күрделі оталарды жасауға мүмкіндік берген.

ШЫМКЕНТТЕ ЖҮЙКЕ ЖҮЙЕСІ АУРУЛАРЫНЫҢ ПРОБЛЕМАЛАРЫ ТАЛҚЫЛАНДЫ

Клиникалық неврология және психатрияның өзекті мәселелері. Дәл осы тақырып ҚР Денсаулық сақтау министрлігі мен Оңтүстік Қазақстан медицина академиясының ұйымдастыруымен өтіп жатқан халықаралық конференцияның өзегіне айналды. Ғылыми конференцияны ҚР Денсаулық сақтау министрлігінің бас неврологы Сәуле Тұрысбекова ашты.

Шымкент қаласы мен Түркістан облысына қарасты аурухана, емхана дәрігерлерінің, ОҚМА оқытушылары мен студенттерінің басын қосқан ғылыми конференцияға Түркия, Ресей, Ұлыбритания елдерінің невролог, невропатолог, эпилептолог, нейрохирург дәрігер-ғалымдары арнайы шақырылыпты.

— Оңтүстік Қазақстан медицина академиясы дәстүрлі түрде ғылыми конференцияларды ұйымдастырып келеді. Биыл клиникалық неврология кафедрасының жетекшілігімен халықаралық конференция өтіп жатыр. Ғылыми конференция барысында алыс-жақын шетелдерден неврология саласының жетекші ғалымдары келді. Біз бұл басқосу арқылы неврология ғылымын жан-жақты дамытып, оны емдеу ісіндегі жаңалықтарды бөлісіп, дәрігерлердің, ғалымдардың тәжірибе алмасуына мүмкіндік беріп отырмыз, - дейді ОҚМА ректоры, медицина ғылымдарының докторы Мырзабек Рысбеков.

Шетелдік дәрігерлер 8 қарашада Түркістан қаласында болып, дәрігерлік қабылдау өткізген. Ресейлік дәрігер-генетик, невролог, нейрофизиолог,м.ғ.к Сергей Курбатов пен ұлыбританиялық невролог, нейрогенетик, профессор Генри Холден жүйке жүйесі ауруларына шалдыққан науқастарды қарап, оларға дәрігерлік кеңестерін берген. Сондай-ақ, қабылдаудан соң, Түркістан облысы мен қаласының дәрігерлерімен кездесіп, өзара тәжірибе алмасты.

Дәрігерлер 9 қарашада Шымкенттегі Түркістан облыстық ауруханасының базасында бас қосып, жергілікті дәрігерлерге шеберлік сабақтарын өтті. Сонымен қатар, диспансерлік есепте тұратын науқастармен кездесіп, оларға дәрігерлік кеңестерін берді.

— Бүгінгі ғылыми конференцияға шақырту алғаным үшін қуаныштымын. Түркия мен Қазақстан – бауырлас елдер. Медицина саласы бойынша да бір-бірімізбен бөлісетін жаңалықтарымыз көп. Тәжірибе алмасу арқылы ғылыми медицинаның дамуына үлкен үлес қосып, науқастарды емдеудің тиімді әрі оңтайлы әдісін бөлісеміз деген ойдамын, - дейді түркиялық невролог-эпилептолог, профессор Жидем Өзкара.

Айта кетейік, конференцияда неврология, нейрохирургия бойынша ғылыми баяндамалар оқылып, жас ғалымдардың ғылыми жұмыстары мен зерттеулері таныстырылды. Сондай-ақ, ғылыми конференция аясында жүйке жүйесі ауруларының түрлеріне қарай дәрігерлер секцияларға бөлініп, салалық тәжірибелерімен бөлісті. Ал, жүйке жүйесін емдеуге арналған дәрілік препараттар өндіретін еліміздің және шетелдік фармкомпанирялардың өкілдері көрмеге қатысып, өз өнімдерін таныстырды.

ШЫМКЕНТТЕ АЛҒАШҚЫ ЯДРОЛЫҚ МЕДИЦИНА ОРТАЛЫҒЫ АШЫЛДЫ

Шымкентте «MIG QAZAQSTAN» ядролық медицина орталығы ашылды. Инвесторлардың қаржыландыруымен ашылған бұл орталық заманауи технологиялық аппараттардың көмегімен қатерлі ісікті ерте кезеңде анықтап, науқастарға дер кезінде сапалы медициналық көмек көрсетеді.

Жиынға Шымкент қаласының әкімі М.Әйтенов, жоба инвесторы «Алмалы» холдингі бас директорының орынбасары Б.Сапаров қатысып, ядролық медицина орталығының мүмкіндіктерімен танысты.

— Жоба мемлекеттік-жекеменшік әріптестік шеңберінде «МедИнвестГрупп Қазақстан» ЖШС-нің қолдауымен жүзеге асты. Мемлекет тарапынан орталық ғимаратын тұрғызуға қаржы қарастырылып, өзге жұмыстар инвестордың қаржысына атқарылды. Қаламыздағы бұл орталық республикадағы үшінші ірі орталыққа айналмақ. Орталықта онкологиялық ауруларды ерте кезеңде анықтап ғана қоймай, науқастарға заманауи ем-дом жасауға мүмкіндік туып отыр. Әсіресе, сәулемен емдеуге арналған соңғы үлгідегі жабдық алынды. Бұл республикада ғана емес, Орта Азияда бірінші болып Шымкентте орнатылып отыр. Геосаяси және пандемия жағдайларына байланысты орталықтың ашылуы 4 айға кешікті. Десек те, инвесторлардың қажырлы еңбегі үшін алғысымды білдіремін. Бір аптаның ішінде 22 кісі ем алып үлгерді. Сондай-ақ, қызметкерлер арнайы біліктілік арттыру курстарынан өтті, - деді Мұрат Дүйсенбекұлы.

Мамандардың айтуынша, жоба аясында радиофармпрепараттардың кеңейтілген желісін және онкологиялық ауруларды емдеуге арналған жоғары дәлдіктегі радиология орталығын пайдалана отырып, радионуклидтік диагностика орталығын құру көзделіп отыр.

— Шымкентте ядролық медицина орталығы ашылып, мұнда Siemens компаниясының компьютерлік томографиямен біріктірілген позитронды-эмиссиялық томография (ПЭТ/КТ) аппараты орнатылды. Бұл құрылғы шымкенттіктерге тереңдетілген диагностика жасауға мүмкіндік береді. Мәселен, ПЭТ/КТ аппараты орнатылғанға дейін біз науқастарды Алматы, Астана қалаларына жолдама негізінде жіберіп отырдық. 2022 жылдың 10 айында 240 науқастың жолға шығуына тура келді. Құрылғы күніне 20 адамға диагностика жасай алады. Яғни, бұл Шымкентті толық қамтамасыз ете алады. Себебі, айына ПЭТ/КТ көмегіне 20-30 кісі жүгініп келген. Бұл бізге көршілес облыс-қалалар мен көршілес мемлекеттердің де азаматтарына көмек көрсетіп, медициналық туризмді дамытуға мүмкіндік бермек. Сонымен қатар, бұл орталықта науқастарды сәулелі терапиямен емдеу шаралары қолға алынып отыр. Бүгінге дейін мыңға жуық науқас ем алып үлгерді. Varian фирмасының Halcyon сәулелі емдеу жүйесінің қатерлі ісікті емдеудегі көмегі зор. ПЭТ/КТ республикада 2-3 қалада болса, Halcyon сәулелі емдеу жүйесі республикада алғаш болып Шымкентте орнатылып отыр, - дейді қалалық денсаулық басқармасының басшысы Н.Асылбеков.

«MIG QAZAQSTAN» ядролық медициналық орталығының директоры Дәулет Ержановтың айтуынша, орталық жылына ПЭТ/КТ аппаратында 5 мыңға жуық азаматқа диагностика жасап, қатерлі ісікке шалдыққан 5 мыңдай науқасқа Halcyon сәулелі емдеу жүйесі арқылы көмек көрсете алады.

— Ядролық медицина орталығының ашылуы — оңтүстік өңірдің ғана емес, еліміздің медицинасын дамытуға жасаған үлкен қадамы. Әрине, халықтың аман-сау болғанын тілейміз. Өмірде түрлі жағдай болады. Орталықтағы заманауи құрылғылар қатерлі ісікті ерте кезеңде анықтап, оны өзге органдарды зақымдамай, ауыртпай емдеуге арналған. Бұл еліміздің өмір сүру жасын ұзартуға да септігін тигізетіні сөзсіз. Жобаға жалпы құны 6,5 млрд теңге қаржы жұмсалды. Біз ары қарай да орталықты дамытып, оңтүстіктегі ядролық медицинаның хабына айналдыруды көздеп отырмыз, - деді Бақыт Сапаров.

Орталықтың радиологы О.Ақжолдың айтуынша, ядролық орталықтағы диагностика белгіленген тәртіппен жүзеге асырылады екен.

— Әуелі, науқас дәрігерден жолдама алып, ядролық медицина орталығының қабылдауына жазылады. Одан кейін қабылдаудан 36 сағат бұрын арнайы диеталық режимді сақтай отырып, зерттеуге дайындалады. Орталыққа келіп, радиофармпрепаратты қабылдаған соң 50 минуттай дәрігердің бақылауында болып, ПЭТ/КТ аппаратына кіреді. Радиолог науқасты 20 минуттай аппаратқа түсіріп, деректерді өңдейді. Ал, дәрігер 2 тәуліктен соң ұйғарым шығарады, -дейді ол.

Айта кетейік, орталықта медициналық көмектің кепілдік берілген көлемі шеңберінде тегін және қолжетімді зерттеулер жүргізілмек. Сондай-ақ, мамандар ерте анықталған қатерлі ісікке дер кезінде ем-дом жасаса, дерттен айығу мүмкіндігінің молая түсетінін алға тартып отыр. Яғни, орталықтағы құрылғының бірі дертті ерте анықтауға, екіншісі науқастың өзге ағзасына зиянын тигізбей, қатерлі ісікті сәуле арқылы емдеуге мүмкіндік беріп отыр. Бұл еліміздегі өлім-жітімді азайтып, халықтың өмір сүру жасының ұлғаюына да септігін тигізбек.

ШЫМКЕНТТІК ДӘРІГЕРЛЕР ЛИТВАЛЫҚ МАМАНДАРМЕН ТӘЖІРИБЕ АЛМАСТЫ

Медицина қызметкерлерінің біліктілігін, білім деңгейін және практикалық дағдыларын арттыру мақсатында Шымкент қаласына бір топ Литвалық дәрігерлер келді. Тәжірибе алмасу жұмыстары кезінде медицина мамандары қалалық перинаталдық орталық базасында кәсіби біліктілігін шыңдады.

Шеберлік сабағына қаладағы медицина ұйымдарынан 50-ге жуық маман қатысты. Тренингті өткізу үшін Каунас қаласынан халықаралық деңгейдегі мамандар, профессорлар, магистрден тұратын Литва денсаулық ғылымдары университетінен мамандар бригадасы арнайы шақыртылған. Нақтырақ айтқанда, профессор, акушер-гинеколог Томас Биржетис; неонатолог, профессор Далья Стонене, анестезиолог-реаниматолог Сергей Истигечев, акушер -Данголе Качкаускене; неонаталдық медбике, клиникалық күтім магистрі Юлия Старик.

Өзге елден келген білікті мамандар бір аптаға жуық жүкті әйелдер мен жаңа туған шақалақтарға медициналық көмек көрсету әдістері бойынша біліктіліктерімен бөлісті.

Шет елдік мамандардың қатысуымен өткен шеберлік сабағында теориялық біліммен қатар симуляциялық манекендерде практикалық дағдылар да пысықталды. Оқыту жұмыстарын ұйымдастырған мамандардың сөзінше, мұндай шеберлік сабағы жүкті әйелдерге және жаңа туған нәрестелерге дер кезінде шұғыл акушерлік, неонаталдық, реанимациялық көмек көрсету сапасын арттырып, ана мен бала өлімін азайтуға зор септігін тигізеді.

«Литвалық дәрігердің үйрету әдісінің ерекшелегі- олар теория мен практиканы дұрыс ұштастыра біледі. Мәселен екі сағат теория оқытса, сол оқытқан теория сабағы бойынша практика жүзінде шеберлік сабағын өткізеді. Биыл Шымкент қаласы әкімідігі тарапынан медицина мамандарын оқыту үшін 36 млн қаражат бөлінді . Жыл басынан бері 10 мыңға жуық медицина маманы кәсіби біліктілігін шыңдады. Мәселен, 800 маман жергілікті бюджет есебінен оқытылса, қалғандары емдеу және аурухана есебінен оқытылған. Менің ойымша, мұндай оқыту жұмыстары қаладағы мседицина қызмет сапасын жақсартып, мамандардың кәсіби біліктілігін шыңдауға зор мүмкіндік береді»-дейді Шымкент қалалық денсаулық сақтау басқармасының басшысы Асылбеков Нұрлыбек.

ЕЛІМІЗДІҢ ОНКОЛОГТАРЫ ШЫМКЕНТТЕ ТӘЖІРИБЕ АЛМАСТЫ

Шымкенттегі онкологиялық орталықта Нұрсұлтан, Алматы, Қарағанды қалаларының онколог-дәрігерлерінің қатысуымен "Онкологиялық тәжірибедегі интервенциялық хирургияның өзекті мәселелері" тақырыбында екі күндік шеберлік сабағы өтті.

Шараны ұйымдастыру үшін орталық базасы арнайы таңдалған. Өйткені Шымкент қаласы онкологиялық орталығы дәрігерлерінің онкологиялық науқастарды емдеуде интервенциялық рентгенологиялық араласуларды орындауда өте тәжірибелі.

Шеберлік сағатында мамандар өзара тәжірибелерімен алмасады. Рентгенхирургияның заманауи әдістерін қолдана отырып, пациенттерге онкологиялық көмек көрсетудің замануи әдістерін, пациенттерді қатерлі ісік және бауыр ісігі аурулары кезінде химиоэмболизациялауға іріктеу, бас және мойын ісіктері кезінде өңірлік химиоинфузия, өкпе және жатыр мойны обыры, сондай-ақ бүйрек обыры мен жамбас ісігі ауруларында ісіктерді эмболизациялау мүмкіндіктерін талқыламақ.

Былтыр Шымкент қаласының әкімі Мұрат Әйтеновтің, денсаулық сақтау басқармасы басшысының қолдауымен және орталық басшылығының белсенді жұмысының нәтижесінде “Phillips azurion-7” заманауи ангиографы орнатылған. Бұл онкологтар үшін де, рентгенхирургиялық ем алатын науқастар үшін де соңғы үлгідегі таптырмас құрал.

Жыл басынан бері бұл ангиографта жоғары технологиялық емдеу санатына жататын бауыр, өкпе, бүйрек және жамбас қатерлі ісігінің химиоэмболизациясы бойынша 150-ден астам ота жасалды.

Орталықтың еліміздің түкпір-түкпірінен келетін пациенттерді де қабылдауға мүмкіндігі мол.

Айтпақшы, Шымкентте қалалық денсаулық сақтау басқармасының басшысы Нұрлыбек Асылбековтың тапсырмасымен «Медициналық ақпараттандыру орталығы» (call center) ашылды.

Орталық нөмірі 8(7252)-41-75-03.

Енді қала тұрғындары денсаулық сақтау саласына қатысты ұсыныстарын, сұрақтарын, арыз-шағымдарын телефонға қоңырау шалу арқылы жеткізе алады.

ОРТА АЗИЯДА ТЕҢДЕСІ ЖОҚ ҚҰРЫЛҒЫ АЛҒАШ РЕТ ШЫМКЕНТТЕГІ ОНКОЛОГИЯЛЫҚ ОРТАЛЫҚҚА ОРНАТЫЛДЫ

Шымкент қалалық онкологиялық орталыққа ПЭТ/КТ аппараты орнатылды. Ашылу салтанатына шаһар басшысы Мұрат Әйтенов арнайы қатысып, құрылғының жұмысымен танысты.

Ядролық медицина орталығында жоғары технологиялық медицина қызметін көрсететін аппараттар орнатылған.

“ Varian Halcyon” -қондырғысы арқылы науқастарға сәулелік терапия емі жүргізіледі. Мұндай құрылғы Өзбекстан, Тәджікістан, Қырғыстан сынды елдерде жоқтың қасы. Орта Азияда теңдесі жоқ құрылғы Қазақстанда алғаш рет Шымкент қаласындағы онкологиялық орталыққа орнатылды.

Айта кетейік, ПЭТ/КТ - бұл компьютерлік томографиямен біріктірілген позитронды-эмиссиялық томография. Басқаша айтқанда, глюкоза негізінде радиофармпрепараттардың көмегімен онкологиялық аурулар мен бас миының ауруларына дәл диагностика жасауға мүмкіндік беретін аппарат.

Қатерлі ісіктің бастапқы пайда болу сатысын анықтауға және патологиялық процессті басқа әдістерге қарағанда ертерек білуге септігін тигізетін соны жабдық. Дәрігерлер заманауи құрылғының көмегімен обыр ауруларының ошағын дәл тауып, пациенттердің емдік шараларын дер кезінде бастауға мүмкіндігіміз көбеймек деп қуанды.

Ал қала басшысы ядролық медициналық кластер үшінші мегаполистің медициналық туризмін жетілдіретін бірден-бір тетік екенін айтып өтті.

- Өйткені біз Шымкент қаласына ғана емес, Түркістан, Жамбыл, Қызылорда облыстарының халықтарына қызмет көрсете аламыз… Ата заңымыздың басты құндылығы халқымыздың денсаулығы екенін ескерсек, атқарып жатқан іс шаралар өмірдің талабы. Қымбат тұратын медициналық қызметтің бұл түрі енді жергілікті халыққа қолжетімді болады”,-деді М.Әйтенов.

Айта кету керек, биыл Шымкент қаласы әкімідігі тарапынан медицина мамандарын оқыту үшін 36 млн қаражат бөлінді. Жыл басынан бері 10 мыңға жуық медицина маманы кәсіби біліктілігін шыңдады. Мәселен, 800 маман жергілікті бюджет есебінен оқыса, қалғандары емдеу және аурухана есебінен оқыды.