Мемлекет басшысы ағымдағы жылдың 1 қыркүйегіне дейін Қазақстанға әкелінген шетелдік автокөліктерді заңдастыру міндетін жүктеген болатын. Қазір бұл үшін мемлекеттік органдар барлық қажетті заңнамалық және ұйымдастырушылық шараларды қабылдауда. Экологиялық және Салық кодекстеріне түзетулер әзірленді. Азаматтар бастапқы тіркеу үшін 200-250 мың теңге көлемінде ғана алым төлейтін болады. Заңдастыру кезінде утиль алым төленбейді. “Кодекстерге түзетулер келесі жылдың қаңтарынан бастап күшіне енеді, сондықтан заңдастыру келесі жылдан бастап жүргізілетін болады. Осы жылдың 1 қыркүйегіне дейін елге әкелінген автокөліктердің тізімі жасалды. Кейінірек әкелінген автокөліктер заңдастыруға жатпайды және жалпы негізде тіркеледі. Бүгінгі таңда ІІМ және басқа да мемлекеттік органдар автокөліктерді заңдастыруды барынша қарапайым және түсінікті ету тәсілдерін әзірлеуде. Автокөліктерді заңдастыру үшін полицияға онлайн-өтініш беру мүмкіндігі пысықталуда. Полициямен байланыс орталықтарының жұмысы ұйымдастырылады. Тіркелген көліктерге қарапайым ақ нөмірлер беріледі, полиция қандай да бір шектеулер қоймайды. Еуразиялық экономикалық одақтың тауары болып табылмайтын автокөліктер кедендік баждарды төлеуі тиіс. Бұл үшін Қаржы министрлігі азаматтарға қолайлы кедендік декларациялау тетіктерін әзірлеуде. Заңдастыруды өткізудің барлық шарттары әзірленгеннен кейін Үкіметтің тиісті қаулысы қабылданатын болады. Айта кету керек, заңдастыруға “қылмыстық” және кедендік бақылаудан өтпеген автокөліктер кірмейді. Автокөліктердің шығарылған жылына және экологиялық санаттарына қарай талаптар жоқ. Қалған талаптар бойынша шешім қазір ұлттық және халықаралық заңнаманы ескере отырып қабылдануда. Сондай-ақ жол ережесін бұзудың кейбір түрлері бойынша жауапкершілікті күшейту болғанымен, полиция шетелдік автокөліктер бойынша ешқандай арнайы рейдтік іс-шаралар жүргізбейтінін де хабарлағымыз келеді. Сақтандыру немесе автокөлік иелерін қудалау мәселелері бойынша әлеуметтік желілерде түрлі ақпарат таралуда. Сондықтан сіздерді тек қана мемлекеттік органдардың ресми ақпаратына сенуге шақырамыз! Қазір үкімет үшін Мемлекет басшысының автокөліктерді заңдастыру жөніндегі тапсырмасын орындау басым міндет болып табылады. Полиция жол қозғалысын қадағалау кезінде шетелдік автокөліктерді заңдастыру қажеттілігі туралы түсіндіру жұмыстарын жүргізуге бағдарланатын болады. Сонымен қатар барлық автокөлік иелерінен жол қозғалысы ережелері мен жолдардағы қауіпсіздік шараларын сақтауды сұраймыз”, – деді ведомствода.

Түркістан облысы Полиция департаменті Есірткі қылмысына қарсы іс-қимыл басқармасының қызметкерлері жастар арасында нашақорлықтың таралуының алдын алу жұмыстарын жүргізу аясында, көпсалалы колледж студенттерімен кездесті. Іс-шараға Түркістан облысы ПД ЕҚҚІҚБ аса маңызды істер жөніндегі аға жедел уәкіл Дәурен Сартаев, нарколог-дәрігер Ақан Сайдуллаев, оқу орнының активі мен студенттері қатысты.

Негізгі мақсаты - жастар арасында нашақорлықтың алдын алу, адамгершілік құндылықтар мен құқықтық сауаттылықты қалыптастыру, салауатты өмір салтын ұстануға тарту және есірткіге қарсы тұрақты ұстанымды қалыптастыру.

Кездесуді ұйымдастырушылар жастармен профилактикалық әңгіме жүргізіп, есірткі мен психотроптық заттарды тұтынудың зияны, олардың адам денсаулығына қандай қауіп төндіретіні туралы айтты. Тәртіп сақшылары студенттерді есірткінің заңсыз айналымы саласындағы ҚР заңнамасымен таныстырып, есірткі заттарын заңсыз сақтау және өткізу жағдайындағы қылмыстық жауапкершілік барын ескертті. Сонымен қатар есірткіні қолданудың салдары туралы бейнероликтер көрсетіліп, есірткіге қарсы тақырып бойынша буклеттер таратылды.

Соңында студенттер өздерін қызықтырған сұрақтарын қойып, өз ойларымен бөлісті. Сондай-ақ жастар "Есірткіге жол жоқ!" тақырыбында өткізілген кездесу үшін алғыс айтып, салауатты өмір салтын ұстанатындарын атап өтті.

Полиция подполковнигі Дәурен Сартаев, нашақорлықтың алдын алу мен оған қарсы тұруға бағытталған мұндай іс-шаралар алдағы уақытта да жалғасатынын жеткізді. Тәртіп сақшылары жастарды жаман әдеттерден бас тартуға және есірткі мен психотроптық заттарды пайдаланбауға шақырады.