Еңбек адамдары – елдің тірегі, қоғамның қозғаушы күші. Олардың табанды еңбегі мен маңдай тері әрбір жетістік пен дамудың негізі. Күні кеше Түлкібас аудандық мәдениет үйінде ауданның ауыл шаруашылығы саласын қорытындылау мақсатында ұйымдастырылған «Алтын күз-2025» мерекелік ісшарасы өтіп, онда шаруалардың жыл бойғы еңбектері еленіп, үздіктер ҚР Ауыл шаруашылығы министрлігінің “Еңбек ері” медалімен, “Құрмет грамотасы”, Түркістан облысы әкімінің Алғыс хатымен, ауданға сіңірген еңбегі үшін” төсбелгісімен, «Ауыл» партиясының құрмет грамоталары және аудан әкімінің алғыс хатымен марапатталды.

Келес ауданына Қазақстан Республикасы Парламенті Сенатының Аграрлық мәселелер, табиғат пайдалану және ауылдық аумақтарды дамыту комитетінің төрағасы Әли Бектаев бастаған жұмыс тобы келіп, «Ecoculture–Eurasia» өнеркәсіптік жылыжай кешенінің құрылыс барысымен танысты.

Қазақстан Республикасы Тәуелсіздігінің 34 жылдық мерекесі қарсаңында Мақтаарал ауданы Достық ауылдық округіне қарасты 3 мыңға жуық тұрғыны бар Ж.Қалшораев ауылына табиғи газ берілді. Көп жылдан бері күткен игіліктің жүзеге асуы ауыл халқының тұрмыс сапасын жақсартып, әлеуметтік инфрақұрылымды дамытуға бағытталған маңызды қадам ретінде бағалануда.

Сауран ауданы кәсіпкерлік саласында тағы бір айтулы жетістікке қол жеткізді. Биыл Қазақстан Республикасы Президентінің «Алтын сапа» сыйлығын алуға арналған конкурс, «Қазақстанның үздік тауары» республикалық конкурс-көрмесі және «Адал Азамат» премиясы бойынша аудан кәсіпорындары үздік деп танылып, ұлттық деңгейде жоғары марапаттарға ие болды.