Бокстан Таиландтың Бангкок қаласындағы U22 санатындағы Азия чемпионатында Санжарәлі Бегалиев чемпион атанды. Қазақстандық боксшы 80 келіге дейінгі салмақтың ақтық сынында Рахматулло Бойматовпен (Өзбекстан) қолғап түйістірді. Нәтижесінде төрешілердің шешімімен жеңіске жетті. Ал Бойматов күміс жүлдені қанжығасына байлады. Айта кетейік, бірінші раундта төреші Санжарәлі Бегалиевтен бір ұпай шегерген болатын.
16-30 тамыз күндері Шымкент қаласында нысана көздеуден және стенд атудан 16-шы Азия чемпионаты өтеді. Сары құрлық додасына Бахрейн, Вьетнам, Гонконг, Үндістан, Қатар, Қытай, Кувейт, Малайзия, БАӘ, Оман, Сауд Арабиясы, Сингапур, Оңтүстік Корея, Жапония сынды 26 мемлекеттен 800-ден астам спортшы қатысады.
Мемлекет басшысы Қ.Тоқаев бұқаралық спортты дамытуды мемлекеттің әлеуметтік саясатындағы маңызды басымдықтардың бірі ретінде белгілеп отыр. Сондықтан мемлекет спорт инфрақұрылымын дамыту үшін тиісті қаражат бөліп, балалардың жастайынан алаңсыз спортпен шұғылдануына қажетті жағдайды жасап жатыр. Еліміздің барлық өңірлерінде көптеген спорт алаңдары ашылып жұмыс істеуде, түрлі кешендер мен спорт залдары салынуда.
Түркістан облысы, Созақ ауданы, Сызған ауылдық округінің Қозмолдақ елді мекенінде тұрғындардың спортпен айналысуы мен балалардың бос уақытын тиімді өткізуіне арналған жаңа нысандар пайдалануға берілді. Ересектерге арналған «Street Workout» спорт алаңы мен балалар ойын алаңшасының ашылу рәсімі өтті. Сонымен қатар ағымдағы жөндеуден өткен кіші футбол алаңының құрылысы да аяқталып, ауыл тұрғындарының игілігіне ұсынылды.
Шымкент қаласында «Азаматтарға арналған үкімет» мемлекеттік корпорациясының құрылғанына 20 жыл толуына және Қазақстан Республикасы Конституциясының 30 жылдығына орай дәстүрлі өңіраралық спартакиада ұйымдастырылды. Ауқымды шараға Түркістан, Қызылорда, Жамбыл облыстары мен Шымкент қаласының командалары қатысып, өзара бақ сынады.
Грекияның Афина қаласында өткен U-17 жасөспірімдер арасындағы әйелдер күресінен әлем чемпионатында Қазақстан құрамасы сапында өнер көрсеткен Түркістан облысының тумасы, Сауранның өрені Усманова Мадхия 57 келі салмақ дәрежесінде алтын медаль жеңіп алып, әлем чемпионы атанды.
Шардара қаласындағы Шардара су қоймасында тұқы балығын спорттық аулаудан Қазақстан Республикасының чемпионаты өтті. Ауқымды жарысқа еліміздің әр өңірінен келген үздік спорттық балықшы командалар қатысып, өзара бақ сынасты. Чемпионат жоғары деңгейде ұйымдастырылып, қатысушылар арасында әділ әрі тартысты ойын өтті.
Өткен апта Түркістан облысы спортшылары үшін табысты болды. Өңір мақтаныштары халықаралық додаларда ел намысын абыроймен қорғап, жүлделі орындарды иеленді.