Іс-шараға Шымкент қаласы дене шынықтыру және спорт басқармасы басшысының уақытша міндетін атқарушы Ермек Дәрменов, спорт мектебі басшылары мен жаттықтырушылар, спортшылардың ата-аналары қатысты.

"Біздің спортшылар шетелге шығып, жоғары нәтиже көрсеткенде, олар елді дәріптеп қана қоймай, сонымен қатар: Қазақстанда каратэ белсенді дамып жатқанын және спорттың бұл түрінің болашағы бар екенін көрсетеді",-деп атап өтті спорт басқармасы басшысының міндетін атқарушы Ермек Дәрменов.

3 - 9 қыркүйек күндері өткен бәсекеде шымкенттік спортшылар жарқын жеңіске жетті. Жасөспірімдер арасында Балнұр Құрбанәлі 61 келі салмақта І орынды жеңіп алса, 54 келіде Айша Ұнталап ІІІ орынға табан тіреді.

Жастар арасында 61 келіде Айжан Бәкірова ІІ орын, 68 келіде Лаура Сағынбек ІІІ орынға ие болды.

Ермек Аманжолұлы жасөспірім спортшыларды жеңісімен құттықтап, алдағы жауапты бәсекелерде де жоғары орындардан көрінуіне сенім білдірді.

Каратэден ҚР еңбек сіңірген жаттықтырушы Қажымұқан Шаттық жас дарындардың бұл нәтижемен тоқтап қалмай, одан әрі де тыңғылықты дайындық жүргізетінін жеткізді.

Шымкент қаласында каратэден жеңісті дәстүр бар. Дархан Асаділов пен Софья Берульцева Олимпиада ойындары және әлем чемпионаттарында жүлдегерлер қатарынан көрінді. Азия ойындары мен құрлық чемпионаттарының жеңімпаздары да жетерлік. Мінекей, олардың ізін жалғайтын жасөспірімдер де оң нәтижелерге қол жеткізуде.

Айта кетейік, чемпионатқа әлемнің 40-тан астам елінен 1200-ге жуық каратэші қатысты. Шымкенттік спортшылар шеберліктерін, табандылықтарын және лайықты дайындықтарын көрсете отырып, өздерінің жоғары деңгейлерін тағы да растады.