Осы ассоциацияның белсенді мүшелерінің бірі – Ғазиза Аужанбайқызы. Ол Әбілхан Қастеев атындағы дизайн және сәндік қолданбалы өнер колледжінің 4-курс студенті, көркем тоқыма мамандығын меңгеруде. Ғазиза қойдың жүнінен заманауи әрі тарихи элементтерді ұштастыра отырып бұйымдар жасап, дәстүрлі қолөнерді жаңа деңгейге көтеріп келеді.
-- Мен қойдың жүнімен жұмыс жасаймын. Қой жүнінен қабырғаға іліп қоюға арналған бұйымдар, тақиялар, сырмақтар, текеметтер және тіпті заманауи бағыттағы аяқ киімдер дайындауға болады, – дейді Ғазиза.
Кейіпкеріміз арнайы өңделіп, түрлі түске боялған жүндерді пайдаланып, бұйымдарының ерекше әрі тартымды болуына баса көңіл бөледі. Ғазиза сонымен қатар кесте тігумен айналысады. Ол бұл жұмыстың көп уақыт пен шыдамдылықты талап ететінін айтады. «Дегенмен, жаныңа тынықтыш сыйлайтын ләззаты да бар», -- дейді қолөнер шебері.
-- Бұл өнер менің жанымның қалауы. Алғашында қиын болды, өйткені тігіс тігуге немесе қолөнер бұйымдарын жасауға ешқашан үйренбеген адам үшін бұл оңай емес, – дейді Ғазиза.
Алайда, колледждегі ұстаздарының қолдауымен қызығушылығы артқан және қазір бұл өнерсіз өмір сүре алмайтынын мойындайды. Ғазиза гобелен тоқуды да меңгерген. Оның айтуынша, күрделі ою-өрнегі бар гобеленді жасауға бір айдай уақыт кетеді. Сонымен қатар, ол сыйға тартуға арналған түрлі сувенирлер, киізден жасалған тақиялар мен тойға арналған қоржындар дайындайды. Оның бұйымдары әлеуметтік желілерде танылып, бүгінде тұрақты түрде тапсырыс берушілер бар. Бағалары 15-50 мың теңгенің аралығында.
Қолөнер шеберлері үшін Шымкент қаласында барлық қажетті жағдайлар жасалуда. Креативті индустрия ассоциациясы мен жергілікті билік қолөнершілерге қолдау көрсетіп, арнайы оқу бағдарламаларын ұйымдастырып, өндірісті дамытуға бағытталған жобаларды жүзеге асыруда. Мұнда шеберханалар, шығармашылық орталықтар және маркетингке арналған платформа құрылып, қолөнершілер өз өнімдерін нарыққа тиімді шығара алады. Мұндай бастама қолөнерді тек өнер ретінде ғана емес, экономикаға тиімді үлес қосатын сала ретінде дамытуға мүмкіндік береді.