– Түркістан – еліміздегі халық тығыз орналасқан облыс. Өңірде еңбекке қабілетті жастағы тұрғындар үлесі 33,7% деңгейінде, бұл Түркістан облысының кадрлық әлеуетін күшейтіп, инвесторлар үшін тұрақты еңбек ресурстарын қамтамасыз етеді. Қытай мен Еуропа арасында тасымалданатын жүктің 85 пайызы Түркістан облысынан өтетін «Батыс Еуропа – Батыс Қытай» халықаралық транзит дәлізі арқылы тасымалданады. Бұл дәліз әлемдік нарыққа шығудың жаңа мүмкіндіктерін ашады. Сонымен қатар, Қытайдағы Ляньюньган портындағы қазақ-қытай логистикалық терминалы және Сианьдағы құрғақ порт сияқты бірлескен жобалар біздің транзиттік әлеуетімізді одан әрі нығайта түседі. Қазіргі уақытта облыста инвесторларға дайын инфрақұрылымы бар жер учаскелерін ұсынатын индустриалды аймақтар және дайын ғимараттарды жеңілдетілген шарттармен жалдау немесе сатып алу құқығымен берілетін шағын өнеркәсіптік парктер бар. Арнайы экономикалық аймақта да инвесторларға мүмкіндік мол. Түркістан облысында инвестициялық ахуал өте жақсы. Маңызды жобаларды сүйемелдеп, толық қолдау көрсетуге дайынбыз. Мақсатымыз – өндіріс орындарын көбейту, – деген Нұралхан Көшеров 20-дан астам инвестор мен компания басшыларымен келіссөз жүргізіп, ұсыныстарын тыңдады.
G2В форматындағы кездесуде Қытайдың бірнеше провинциясының басшылығы мен делегациясы, инвесторлары ауыл шаруашылығы, туризм, құрылыс салалары бойынша ұсыныстарын жеткізді. Сонымен бірге күн және су электр станциясын салу, инфрақұрылымды жаңғырту білім саласында әріптестік орнату және өзге де жобалар бойынша пікірлерін айтты. Әрбір ұсыныс пен жоба зерделеніп, тиісті жұмыстар атқарылады.
Айта кетейік, Түркістан облысында инвестиция тарту, өндіріс орындарын көбейтуге басымдық берілген. Жалпы өңірде 2025-2028 жылдар аралығында жүзеге асатын 111 инвестжобалар пулы қалыптасқан. Жоба толық іске асқан жағдайда 23 915 жаңа жұмыс орнын ашу көзделген. Биыл 58 инвестициялық жоба қолға алынып, нәтижесінде 8 250 тұрақты жұмыс орны ашылады. Бүгінде 34 инвестжоба іске қосылып, 4889 адам жұмыспен қамтылды. Сонымен қатар биыл 10 айдың қорытындысымен облыстың капиталына 1 178,4 млрд. теңге көлемінде инвестиция тартылған. Облысқа 2025 жылға 475 млн. АҚШ доллары көлемінде тікелей шетелдік инвестициялар тарту индикаторы бекітілген. II тоқсанның қорытындысымен тікелей шетелдік инвестициялар көлемі 543,5 млн. АҚШ долларын құрап, жылдық жоспар артығымен орындалды.
Жалпы, Түркістанда өткен «TURKISTAN INVESTMENT AND TOURISM FORUM – 2025» халықаралық форумында жалпы құны 432,2 млрд теңгені құрайтын 7 меморандум бекітілді. Іс-шараға Түркістан облысының әкімі Нұралхан Көшеров қатысып, өңірдің инвестициялық әлеуетін таныстырып, инвесторлармен әріптестікті күшейтуге ерекше назар аударғанын бұған дейін де айтқан болатынбыз. Осы тұста айта кетер болсақ, маңызды келісімдердің бірі - Сауран ауданында жүзеге асатын 16 млрд теңгелік жоба. Бұл бағытта Xiang Hopi i Ma Aerial Machinery компаниясының өкілі Хан Бо мырзамен екіжақты меморандумға ресми түрде қол қойылды.
Компания интеллектуалды технологияларды қолдана отырып ауыл шаруашылығы техникасы мен жабдықтарын өндіруге маманданған. Негізгі қызметі – топырақ өңдеу, егін жинау және агропроцестерді автоматтандыруға арналған заманауи машиналар жасау. Өнімдері ішкі нарыққа да, көрші елдерге де экспортталады. Бұл жоба Сауран ауданында жаңа өндіріс орнын ашуға, заманауи агротехниканы енгізуге және жаңа жұмыс орындарын құруға жол ашады. Сауран ауданы инвесторлармен серіктестікті нығайтып, ауыл шаруашылығы саласын технологиялық тұрғыда жаңғыртуға дайын.
«WWW.AQ-QARA.KZ» - ақпарат