Іс-шараға Түркістан облыстық мәслихатының төрағасы Нұралы Әбішов, облыс әкімінің орынбасары Нұрбол Тұрашбеков, Мемлекеттік қызмет істері агенттігінің Түркістан облысы бойынша департаментінің басшысы Абылайхан Наурызбаев, Түркістан қаласы әкімінің орынбасары Әбілсейіт Рабаев, сондай-ақ облыстық басқармалар мен департаменттердің басшылары, ардагерлер, мемлекеттік қызметшілер және ерікті жастар қатысты. Акцияның негізгі мақсаты – қоғамда экологиялық жауапкершілікті күшейту, сыбайлас жемқорлыққа қарсы мәдениетті қалыптастыру және тұрғындарды қоршаған ортаны қорғауға бағытталған игі бастамаларға жұмылдыру. Сонымен бірге, қала аумағында жасыл желекті көбейту, экологиялық ахуалды жақсарту және тұрғындар үшін қолайлы демалыс аймақтарын арттыруға үлес қосу көзделді.
Іс-шара барысында қатысушылар саябақ аумағына бірнеше жүз түп көшет отырғызды. Ұйымдастырушылардың айтуынша, мұндай акциялар табиғатты қорғау санасын нығайтып қана қоймай, қоғамдағы ашықтық пен парасаттылық қағидаттарын кеңінен насихаттауға мүмкіндік береді. Жалпы, Түркістан қаласында экологияны жақсартуға және сыбайлас жемқорлықтың алдын алуға бағытталған іс-шаралар жыл бойы жалғасын табатын болады.
Түркістан қаласы еліміздің рухани астанасы ретінде өзінің тарихи маңыздылығымен танымал болса, қазіргі уақытта оның экологиялық жағдайы да маңызды мәселе болып отыр. Қаладағы табиғи ресурстарды қорғау мен экологиялық тұрақтылықты сақтау мақсатында бірқатар іс-шаралар қолға алынуда. Түркістанның экологиялық жағдайы өңірдің болашағына тікелей әсер етеді, өйткені қаланың даму үрдісі мен табиғатты қорғау шаралары өзара тығыз байланысты.
Түркістан қаласында экологиялық мәселелерді шешу және табиғатты қорғау бағытында бірқатар шаралар қолға алынуда:
1.Жасыл желектерді көбейту: Қала аумағында жасыл желектерді көбейту және көгалдандыру жұмыстары жүргізіліп жатыр. Әсіресе, тұрғын алаптар мен қоғамдық орындарда ағаштар отырғызу экологиялық жағдайды жақсартуға ықпал етеді.
2.Қалдықтарды қайта өңдеу: Қалдықтарды тиімді жинау және қайта өңдеу жүйесін дамыту үшін арнайы контейнерлер орнатылып, экологиялық сауаттылықты арттыру бойынша ақпараттық науқандар жүргізілуде.
3.Су ресурстарын үнемді пайдалану: Су ресурстарын тиімді пайдалану мақсатында арнайы бағдарламалар енгізіліп, су үнемдеуші технологиялар қолдану басталды. Бұл, әсіресе, суармалы жерлерде су тапшылығын шешуге бағытталған.
4.Жасыл энергия көздеріне көшу: Түркістанды экологиялық таза энергия көздеріне көшіру мақсатында күн энергиясын пайдалану жобалары қолға алынған. Бұл бастама қаланың энергияны үнемдеуіне және экологиялық жағдайды жақсартуға септігін тигізеді.
Түркістан қаласы экологиялық туризмді дамыту мүмкіндігі бар өңір ретінде де танымал. Қала мен оның айналасында табиғи және тарихи нысандар көп. Экологиялық туризмді дамыту арқылы қаланың экологиялық ахуалын жақсартуға және жергілікті экономиканы нығайтуға болады. Бұл бағытта туристерге экологиялық тұрғыдан таза және табиғатпен байланыста болуға мүмкіндік беретін маршруттар мен демалыс орындары ұсынылуда.Экологиялық мәселелерді шешуде жергілікті тұрғындардың қатысуы өте маңызды. Қалада экологиялық мәселелер бойынша білім беру бағдарламалары ұйымдастырылып, тұрғындар мен кәсіпкерлерге экологиялық тұрғыда дұрыс шешімдер қабылдауға көмектесетін кеңестер берілуде. Түркістанның экологиялық жағдайы қоғамның белсенділігімен ғана жақсарады.
Түркістан қаласының экологиялық жағдайын жақсарту үшін алдағы жылдары қосымша шаралар жүзеге асырылады. Олардың қатарында қаланың инфрақұрылымын жаңғырту, экологиялық қауіпсіздік шараларын күшейту және экологиялық білім беру жүйесін дамыту жоспарлануда. Түркістан қаласының экологиялық жағдайы – қала мен оның тұрғындарының болашағы үшін маңызды мәселе. Экологиялық тұрақтылықты қамтамасыз ету және табиғатты қорғау шаралары жүзеге асырылған жағдайда, Түркістан тек тарихи әрі рухани орталық ретінде ғана емес, сондай-ақ экологиялық тұрғыдан таза және дамыған қалаға айналады. Қала тұрғындарының белсенділігі мен жергілікті биліктің бірігіп жұмыс істеуі Түркістанның экологиялық ахуалын жақсартуда маңызды рөл атқарады.
Түркістан қаласында 2023-2025 жылдар аралығында қала аумағында 7,5 миллионнан астам маусымдық гүл отырғызылған. Негізгі көшелер мен қоғамдық демалыс орындарына да бас-аяғы 441 739 түп бұта мен ағаш көшеттері отырғызылған. Оның ішінде 240 396 бұта түрлері, 154 313 декоративті ағаштар, сондай-ақ 46 030 жеміс ағаштары қала келбетін көркейтіп, экологиялық ахуалды жақсартуға бағытталған. Жасыл желектердің басым көпшілігі Бекзат Саттарханов, Тәуке хан, Саттар Ерубаев, Абылайхан, О.Жарылқапов, Б.Момышұлы, Ә.Жангелдин, Ж.Баласағұни көшелері мен Яссы, Отырар, Сауран, Тұран, Жұлдыз, Жібек жолы шағынаудандарына отырғызылған. Ал маусымдық гүлдер Қ.А.Ясауи кесенесі алдындағы алаңға, Тәуелсіздік саябағына, Орталық алаңға, Теміржол вокзалы аумағына, Нұр-Сұлтан даңғылы бойына және жаңа шағынаудандардағы гүлзарлар мен аллеяларға егілген болатын.
Қала тазалығын сақтау бағытында да жүйелі шаралар атқарылуда. Бүгінде Түркістан қаласы аумағында 1262 қоқыс алаңшасы мен 2719 дана қоқыс контейнері орнатылған. Қалдықтарды шығару үшін 34 арнайы техника жұмылдырылған. Атап өтер тағы бір жайт, Түркістан қаласы саябақтар мен субұрқақтардың саны бойынша республикада алдыңғы қатарда тұр. Қазіргі таңда қала аумағында 100-ге жуық субұрқақ іске қосылып тұр. Әрбір субұрқақ өзіндік бірегей дизайнмен және стильмен ерекшеленеді. Олардың қатарында ұлттық нақышта жасалған үлгілер де, заманауи архитектуралық шешімдермен безендірілген туындылар да бар.
Қаланың сәнін кіргізіп тұрған субұрқақтарды қала қонақтары мен тұрғындары сағат 10:00-ден кешкі 23:00-ге дейін тамашалай алады. Кешкі уақытта түрлі-түсті жарықтармен көмкерілген субұрқақтар су шоуына айналып, ерекше атмосфера сыйлайды. Субұрқақтар арқылы Түркістан тек тарихи-рухани ғана емес, сонымен қатар заманауи және жайлы қала ретінде қалыптасып келеді. Мұнан өзге қала аумағын абаттандыру және көріктендіру бағытында да «Жасыл Түркістан» коммуналдық мемлекеттік мекемесі тарапынан бірқатар жұмыстар атқарылу үстінде.
Б.Саттарханов даңғылы бойында, Павлин құс мүсіні мен «Арена» кешені маңында гүл отырғызу жұмыстары жүргізілуде. Сонымен қатар, көгал және арам шөптерден тазарту жұмыстары да қарқынды жүзеге асуда. Атап айтқанда, Экобазардың үшбұрышты аумағында, Павлин құсының маңында және Аэропорт тас жолы бойында арам шөптер орып, көгалдарды ретке келтіру жұмыстары жүргізіліп жатыр.
Ретке келтіру бағытында да бірнеше нысанда жүйелі жұмыстар атқарылуда. Б.Саттарханов даңғылы бойындағы «Нұрсәт» дәмханасының жанындағы ойын алаңы қалыпқа келтіріліп, жөндеу жұмыстары жүргізілуде. Сондай-ақ, жол көрсету белгілерін жаңарту, жаяу жүргіншілер жолдарын жуу жұмыстары жүргізілуде. Аэропорт тас жолы бойындағы көпірге сырлау жұмыстары жасалып, қаланың эстетикалық келбетіне мән беріліп жатыр.
«WWW.AQ-QARA.KZ» - ақпарат